政情:笑星議員玩殘李焯芬

日本核危機升級，全球都希望有個救星救地球，尋日立法會保安事務委員會討論日本嘅核事故，一啲非保安小組嘅議員都貢去聽，議員踴躍發問，如日本點解唔用遙控關閉核設施？點解冇預警系統？佢哋嘅高科技視野可以話超日趕美，可惜結果卻似笑星救地球多啲，仲嚇呆咗列席會議嘅大亞灣核電站安全諮詢委員會副主席、港大土木工程系講座教授李焯芬，答問題要由ABC講起。

香港日前先爆單「盲搶鹽」事件，成為歐美日傳媒嘅笑料，尋日保安事務委員會開會，熱心又關心嘅議員又嚟搞笑，中總嘅黃宜弘話科技日新月異，點解日本唔可以喺核電站設立遙控監察系統，遇上大天災時都可即時用遙控關閉核設施嘛！佢對核電站系統嘅思維似乎好有創意又好前衞，至少李教授聽咗都呆一呆。

跟住又有議員問點解冇地震預警系統，畀人及時關閉核反應堆？工聯會潘佩璆就關注福島核電站使用嘅原料，佢話睇到報紙，知道福島用鈈元素做燃料，又話知道鈈係用嚟做核武，用嚟發電好唔尋常，問專家知唔知日本政府背後有咩動機喎！

潘佩璆諗多咗

佢哋一輪嘴後，執教鞭幾十年嘅李教授都畀呢啲唔熟核電、但又創意十足嘅問題難倒，當堂呆咗吓先接招。佢冇正面回答遙控關閉嘅問題，只係話日本核電站喺地震後已經自動關閉，而今次核洩事故根本唔關個關閉系統事。至於鈈元素，李教授就好細心解釋，話鈈元素雖然可以做核武，亦可用嚟發電，只係用嚟做核武嘅濃度要比用嚟發電嘅高好多先得，間接話畀潘醫生知佢諗多咗嘞！至於預警系統，佢更語帶傷心咁話：「作為科研工作者難免感到傷感，因為地震係好難預知嘅。」