財爺人人喊打 智囊踩多兩腳

港府認真行衰運，頭頭碰着黑。「史上最廢」預算案令民怨爆煲，社會矛盾激化不特止，連前高官亦睇唔過眼。眾叛親離，四面楚歌，今屆政府搞唔好分分鐘提前倒數。

前財政司司長梁錦松辭職後一向堅持「不在其位、不謀其政」，今次預算案鬧劇演變成政治風波，實在忍無可忍要出聲，唔點名批評現任財爺曾俊華每人派錢六千蚊補鑊，只「幫得一時」，根本無助扶貧。

阿松仲暗批預算案短視，對提升香港競爭力及加強教育培訓欠缺長遠目光，指「授人以漁」至係真正嘅扶貧。果然係官場過來人，句句到肉，就怕鬍鬚曾呢個牛皮燈籠點極都唔明。

預算案一出嚟就仆直，鬍鬚曾即時轉軚補鑊，實在太肉酸。前任高官一個接一個開腔炮轟，港府不得人心，好似過街老鼠咁人人喊打，仲有乜管治威信可言吖。

市民眼睛係雪亮嘅，高官掂唔掂心中有數。港大民意研究計劃最新調查發現，鬍鬚曾嘅表現評分比預算案發表前暴跌近九分，僅得四十六點六分，創歷史新低，反對佢出任財政司司長嘅比率亦首次高過支持率；反對煲呔曾做特首嘅高達五成四。沙煲兄弟民望低處未算低，捱唔捱到夠鐘都好成問題。

施政混亂，市民群起而攻之，港府管治已經威信掃地，偏偏又有籠裏雞作反，乘機踩多兩腳。

呢次隻籠裏雞係港府智囊中央政策組。佢哋設計咗一套問卷，委託中文大學做調查。民調罕有咁問到唔少敏感議題，譬如鬍鬚曾係咪要為預算案引發嘅爭議落台、對煲呔曾嘅信任程度有幾高、香港係咪陷入管治危機等等。有立法會議員懷疑咁做法係為鬍鬚曾下台鋪路，要求當局向市民公布民調結果。

叮！試問負責為民意把脈嘅中央政策組，如果民調結果係多數人希望曾氏孖寶早走早着，佢哋係咪冇得留低先？唔係嘅話，民調做嚟都唔知為乜！

講真，鬍鬚曾會唔會因為今次民調冇得撈冇人知，計太一叮話齋，應該謝罪落台嘅，仲有中央政策組首席顧問劉兆佳。佢前排拋出「臨界點」論掀起政治風波，跟手又出爾反爾唔認數。仲有舊帳未算㗎，○三年面對民怨沸騰，佢錯判形勢，話大概只有三萬人上街，結果爆發五十萬人大遊行，誤導港府，更令中央政府冇面。呢個誠信破產嘅首席顧問，唔知幾時辭職呢？叮！