政情：侯志強勝選寸爆食力簡
新界二十七個鄉事委員會陸續完成換屆選舉，再有重量級鄉事成員落敗，早前曾傳出有意出山爭做上水鄉委會主席嘅「食力簡」簡炳墀，前日果然出選鄉委會執委選舉，據聞，食力簡張名單只得十六票，被原主席侯志強名單四十四票擊敗，入唔到執委會，梗係冇機會爭主席喇。
侯志強尋日好豪氣咁話：「選舉結果意料中事啦，如果（我）連簡炳墀都贏唔到，仲使出來做嘢嘅？我哋做鄉郊事務向來講心唔講金嘅！」咁係咪證明侯主席有「食力」呢？
點知侯主席話：「我係講實力嘅，唔係食力！」唔知食力簡聽到呢番說話會點呢？我哋前晚已搵過食力簡，但佢話自己瞓咗覺而掛線，尋晚亦搵唔到佢，慰問都無機會！