「玩具大王」旭日集團主席蔡志明舊年十一月收購咗喜運佳之後，阿仔蔡加讚（Karson）同家姐蔡加怡（Crystal）就多咗門生意睇，尋日兩姐弟落咗中環巡舖，Karson話財爺向市民大派六千蚊，佢哋會諗吓以此作招攬，催谷吓中價錶市場。遲啲瑞士舉行「巴塞爾鐘錶展」，佢哋都會去朝聖。
蔡家上下都係愛錶之人，Karson都有廿幾三十隻藏品，至於蔡老闆早前預訂Roger Dubuis三十六卡方形鑽錶已抵港，全球僅此一隻，售價達五百九十二萬元，兩姐弟可以先睹為快。
加怡加讚兩姐弟搶先一睹爸爸豪擲近六百萬元訂購嘅全球唯一嘅Roger Dubuis鑽錶。
