政情：金勞詹幫鬍鬚曾解心結
財爺鬍鬚曾呢輪猛咁畀人叫下台，佢雖然一直死撐，但日前先同佢食過飯，仲做埋心理輔導嘅金融服務界議員「金勞詹」詹培忠就話，鬍鬚曾席間冇咩表情，但就感覺對方有啲進退失據。民意怨氣咁大，唔係死撐可以解決問題嘅。
金勞詹話，上兩個星期約咗鬍鬚曾同佢嘅政治助理葉根銓食飯，席間，佢曾經同鬍鬚曾講，做官要勇於承擔同埋唔好怕畀人鬧。
金勞詹仲引用上年政改一役，中聯辦都臨時改方案為例，話今次港府突然跪低冇乜大不了喎！呢啲其實係金勞詹客串心理輔導角色嘅用語啫，唔代表鬍鬚曾問責下台嘅壓力解除噃！
