政情：政策被剝光邱騰華裸晒

環保係熱話題，可惜港府嘅環保政策卻失敗居多，好似改善空氣污染恢復藍天嘅工作，咁多年就得個講字。尋日立法會開大會，議員批評港府改善空氣污染不力，更質疑環境局局長邱騰華喺停車熄匙政策上畀人「剝光豬」，要求佢問責落台，坐喺官員席嘅邱騰華死撐本港空氣已經有改善，仲話自己會「全力以赴」喎。出咗全力唔代表有能力成功推行政策，好心邱騰華搞清楚乜嘢叫問責制喇！

「全力以赴」唔落台

立法會議員尋日三度質問邱騰華點樣改善空氣污染，佢都顧左右而言他，公文袋人忍唔住話，港府早在○九年施政報告已經提出檢討空氣質素指標，經過近一年半，到家吓都冇提出具體安排，直斥邱騰華失職，仲話如果今年六月仍未能推出新指標，邱騰華好應該即時問責下台。

邱騰華哦哦遊花園後，建制派議員都忍唔住，經濟動力議員梁君彥亦跟上，佢話，港府近年先後推出多項環保政策，最終都搞到被迫讓步，一係就被改到面目全非，好似停車熄匙立法咁，依家雖然立咗法，但效果同「剝光豬」有乜分別？意思係完全冇牙力。

其實，呢個政策由邱騰華一手一腳跟，條例有等於無，同佢推動政策嘅能力有關，與其話條例畀人剝光豬，不如話邱騰華畀人剝光豬好過喇。

議員講完一堆數字同目標後，邱騰華回應時卻大耍太極，一陣話自己會「全力以赴」，一陣又話香港空氣已經好咗，相信公眾會明白事理喎，好似揶揄立法會議員唔明白事理咁，佢講嚟講去，就係寧願全力以赴做光豬局長，都唔回應問責下台。