政情：李嘉誠李澤鉅晤英首相
長實集團主席李嘉誠旗下生意業務遍布全球，每逢到各地巡視業務，總會引嚟各方人士注意。咁啱尋日有人報料，話前日英國時間下晝四至五點，見到誠哥同兒子李澤鉅（Victor）現身英國唐寧街十號首相府，仲目擊有人舉相機影相添！消息人士話，誠哥兩父子現身英國首相府，主要係同英國首相卡梅倫（David Cameron）會面。
巡視英國多項業務
消息人士表示，誠哥喺英國有好多業務，亦有捐錢做善事，好多時會赴英巡視業務，期間會同各方面人士會面傾吓偈。至於誠哥兩父子同卡梅倫見咗幾耐同傾咗啲乜，咁就唔清楚嘞。不過，誠哥日前啱啱榮登財經雜誌《福布斯》（Forbes）今年度全球富豪榜第十一位，身家達二千零二十五億港元，穩居全球華人首富位置，當然成為焦點人物啦。
李嘉誠同李澤鉅兩父子前日到英國唐寧街首相府，同首相卡梅倫會面。 （資料圖片）
英國首相卡梅倫