政情：搞搞政：孫公民望插谷底縮班拆彈捱炸

教育局力推全港縮班，局長孫明揚雖然頻頻落區同啲教育界人士曉以大義，但亦引發近年罕見嘅教育爭議，最令人詫異嘅係激發官中名校校友強烈反彈，孫公畀人鬧餐死之外，雙方亦好大可能要喺法庭見。呢一鋪，拆慣彈嘅孫公似乎都走避不及，事關港大最新民調顯示佢嘅民望已經跌入「臨界點」，前途真係危危乎！

港大嘅最新民調顯示，孫公嘅民望不但出現負值，而且係負二十五，咁多個問責局長中佢仲係最差嗰個，而且反對孫公出任教育局局長嘅受訪者高達百分之四十九，差少少就達五成，即一半受訪者都唔想佢做教育局局長，比例之高，連調查機構都形容孫公已經逼近「表現失敗」嘅分水嶺，即係話，孫公已經踩緊鋼線，一個失手就分分鐘冇得救。

不過，縮班政策已經喺多區簽咗協議書，孫公喺呢條咁難行嘅路上已經行過咗大半，嚟緊要面臨嘅危機可能係喺法庭見，同法庭對呢個政策嘅裁決，總之就係噩夢未完啦。孫公之外，民政事務局嘅德成局長民望亦喺調查中得負百分之三，同樣不得人心。