政情：如臨大敵浪費警力鬍鬚曾生人勿近

民怨沸騰加上政府管治超弱勢，近排高官出席公開場合都好似變咗驚弓之鳥咁，尋日財爺鬍鬚曾出席一個推廣電動車嘅活動時，警方就如臨大敵咁，保安嚴密到烏蠅都飛唔入。不過，成個安排事後證實卻有浪費警力之嫌，事關現場根本就冇示威者，反而鬍鬚曾生人勿近嘅樣就搞到傳媒想埋身都難。特區高官出席公眾場合咁畏首畏尾，既唔大體，又實在反應過敏噃！

個活動尋日下晝舉行，鑑於近排預算案引發嘅民怨太厲害，煲呔曾早前出席辛亥年紀念活動時又聲稱畀人撞心口，警方尋日明顯加強戒備，會場外幾十米已見鐵馬攔路，防止閒雜人等隨意靠近，會場外既有鐵欄分隔嘅示威區，進入會場前仲有更亭查閱出入人士證件，總之如非活動團體相關人士就不得其門而入。

現場唔見示威請願人士

咁大陣仗，警方動用嘅人力自然唔少，隨便一睇都可見超過十個軍裝警員在場，其中兩至三個專門負責指揮車輛入場，另外一啲就分散喺更亭、鐵馬前。諷刺嘅係，咁多警力卻用嚟拍烏蠅，事關喺活動舉行前後，現場既冇示威者，又冇嚟遞信嘅請願人士，唔知警方係收錯料定係虛驚一場呢？

最搞笑嘅仲係鬍鬚曾，佢喺嚴密保安下坐車嚟到，架車直駛入舉行活動嘅現場，佢由致詞到大合照，只係逗留咗唔夠半個鐘就匆匆離開，對推動電動車有幾大幫助我哋唔知，但高度保安涉及嘅浪費同擾民就有排計。事件只說明兩樣嘢，一係警方資料唔準確，只好有殺錯冇放過；一係就係一朝被蛇咬，十年怕草繩，但佢哋有冇諗過慎用公帑、唔好擾民呢？