港鐵管理荒謬　買車新不如舊

閉門造車聽得多，閉門買車聽過未？無論造又好，買也罷，罔顧實際亂咁嚟，一定撞板多過食飯。呢，港鐵斥巨資購買新車，改善服務變咗靠害司機，危及乘客，搞出個大頭佛。

港鐵大手筆用近四億元購買廿二部第四代輕鐵列車，更新換代本來係好事，弊在今鋪好事變壞事，新車落地一年幾已經問題多多，車長有彈冇讚，乘客怨聲載道。更大鑊嘅係，問題涉及車廂設計，構成相當大嘅風險。

呢款新車前年年底正式投入服務，試車嗰陣已經發現設計唔掂。車長同乘客更揭發車廂設計五宗罪，其中最嚴重嘅係駕駛艙正面同兩邊玻璃成直角，畀五至六吋粗嘅金屬框架鑲起，阻礙車長視線。

車長揸車要眼觀六路，隨時留意前後同兩邊路況，金屬框好似喺車頭兩邊戙咗兩條龍門柱咁，車長視野受到遮擋，而舊款嘅梯形車頭設計視野反而更廣闊。新車玻璃同樣唔掂，容易反光，尤其晚上對頭車着燈駛近，強光刺眼，車長根本睇唔清前路，懷疑問題同玻璃角度及濾光不足有關。新車不如舊車，你話係咪荒謬吖？

叮！車長視野受影響，路面狀況睇唔清，唔使出動專家，淨係用普通常識判斷，都知設計唔妥啦。咁大件事港鐵居然關人個關。有車長踢爆，新車落地前已經反映過問題，但管理層一於少理，仲要以新車設計做舊車翻新嘅標準，錯上加錯。

人命關天，車長惟有拖慢車速，班次延誤總好過遇上突發狀況反應不及。改善輕鐵服務變咗增加乘客不便，直頭係攞嚟搞。

查實，呢款國產新車○九年抵港時，已試過「未出車先出軌」，港鐵事後話事故同新車無關。市民對輕鐵新車疑慮未消除，又被揭發設計有問題，如果當局再唔正視，市民對港鐵只會愈來愈冇信心。

講真，唔係市民杞人憂天，而係港鐵管理實在乏善可陳。第二樣唔講，淨係事故頻密程度已經嚇死你。由上個月十號到今個月十號短短一個月內，港鐵已經先後發生過五宗嚴重事故，最嚴重一次列車服務受阻足足四粒鐘。

前日一列東鐵線北行列車駛近羅湖站時，因供電系統故障跪低，大批乘客被困冇燈冇冷氣嘅車廂內，受影響市民數以萬計，仲連累到深圳羅湖口岸要緊急封關，暫停旅客出境，認真丟架 。

港鐵大股東係港府，肩負社會責任，但呢間公司淨係識賺到盡，狂賺一百二十億照樣加價唔在講，仲罔顧乘客安全。計太一叮話齋，呢啲咪係典型嘅為富不仁囉！