政情：生命．源公園大吉利是？

為宣揚捐贈器官可拯救無數病人生命呢個善舉，政府計劃喺九龍公園設立一個器官捐贈嘅象徵性地標，暫定叫做「生命．源」，但估唔到呢個名引發議員同官員之間一場小辯論。

立法會一個委員會尋日討論有關建議時，保險界議員陳健波唔知係咪平日慣咗包裝保險產品，對「生命．源」呢個名頗有保留，覺得令人聯想到「生命玩完」嘅意思，聽落有啲古怪同負面。言下之意即係問政府會唔會改名。

食物及衞生局局長周一鑊話個名係由年輕藝術家提議，自己唔係藝術人唔敢批評，但當局都幾受落，覺得可解做「生命起源」，寓意捐贈器官可令病人重獲新生咁話，仲話個名含蓄啲，反而可吸引市民留意同思考箇中意義。

本身係顧問醫生嘅工聯會潘佩璆就加把口，仲集兩家之大成，話個名可以解一個生命完結，另一個生命重生。大家「完」來「源」往愈講愈玄，最後政府都係決定保留原名。