政情：搞搞政：日本震災陳智思撥備賠保

世紀海嘯重創日本，而喺上禮拜五日本震災爆發嘅時候，港區全國人大代表Bernard陳智思搭緊飛機去北京，佢一抵埗開手機，即刻收到助理短訊，跟住公司職員又密密匯報災情。為乜佢哋咁緊張？因為佢旗下間保險公司有份為日本地震保險賠償做分保囉。

外號「公職王」嘅Bernard，公職繁忙，公司業務一樣纏身，分別擔任家族生意亞洲金融集團同亞洲保險總裁。佢話日本大地震，全球保險公司難獨善其身，事關分保地震賠償係家常便飯。嘩！日本災情嚴重，咪賠得好甘？原來啲員工第一時間向佢派定心丸，評估亞洲保險要賠償嘅金額約一千萬港元至幾千萬港元左右，「損失」唔算嚴重。

Bernard話做得分保，預咗要賠，錢銀「損失」係小問題，反而希望日本災情能夠盡快受控，減少人命傷亡，尤其擔心地震帶延至日本中部，事關佢有唔少朋友定居東京。