政情：何東女宿生遊舊舍興奮
港大唯一女生宿舍─何東夫人紀念堂，尋日邁進六十周年，大學請嚟一班知名舊宿生齊齊慶祝。港大榮休教授楊紫芝係「何東」第一批宿生，堪稱「何東大姐大」。回想當年，佢最愛約班同學喺宿舍挑燈夜讀，試過三更半夜討論問題時聲浪太大，畀其他宿生敲門投訴。住宿三年，最難忘係當年舍監照顧周到，早餐必有牛奶、鮮橙同三文治，禮拜六仲有豬膶補充營養，食到個個肥肥白白。
獲獎無數嘅《歲月神偷》監製張婉婷都係「何東人」，尋日舊地重遊，心情興奮。書卷氣濃嘅張導演，大學時原來坐唔定，多次號召成班女宿生參加體育比賽。佢笑言當年喺運動場嘅時間，仲多過喺課室，所以畢業時，好多同班同學都唔多認得喎！
楊紫芝（左）同張婉婷（右）係唔同年代嘅「何東姊妹」。