政情：五散人散晒各自飛

被外界稱為「五散人」嘅立法會五名獨立議員，包括會計界陳茂波、保險界陳健波、IT界譚偉豪、醫學界梁家騮同廠商會林大輝，曾經話過希望大家可以團結啲，一度聯手針住政府施政發炮，希望提高支持度，增加同政府嘅議價能力，但似乎有心無力喎！

據講，已合作逾兩年嘅五散人，向來都約定逢禮拜三立法會大會前，去隔籬嘅中國會齊齊食早餐，順便開會討論關注嘅議題，並交代各自嘅投票意向。不過，由於五散人中嘅陳茂波同IT豪都係虔誠嘅基督徒，時時寧願放散人兄弟飛機，都唔想放耶穌飛機，故最後經常都搞到流會收場。其後，佢哋曾經試過將「每周一會」改喺禮拜五財務委員會當日舉行，但由於各人公事繁重，出席率依舊欠理想。去到近期，佢哋更連見都唔見，有乜嘢都喺電話講。

圍內冇召集人制度

由於五散人呢個朵實在太深入民心，就連政府都早當佢哋係一夥人，有時要拉票或傳達政府訊息時，都會選擇打畀向來同政府關係較好嘅散人，希望佢可以將訊息傳埋畀班兄弟，等佢哋可以慳番層工夫。不過，有散人就透露，佢哋圍內根本冇召集人制度，故即使佢收到政府電話，亦會直截了當叫啲官打齊晒畀啲兄弟交代，以示尊重。可見佢哋皆想被視為獨立議員，多於係一夥人，五散人分崩離析再現端倪。

五散人走向更散之路，唔多唔少同下屆特首選舉有關。有散人就笑言，由於班兄弟各自同下屆疑似特首候選人「友好」，所以最後無論邊個成功跑出，佢都肯定唔憂做，亦認為五散人毋須刻意團結，順其自然就好喎。五散人真係名副其實散晒！