未曾離職已問價　洋人擺明玩西九

阿媽教落，講大話會甩大牙。西九管理局前行政總裁謝卓飛突然劈炮，然後又「閃電」過檔英國文化協會任全球藝術總監，引起全港嘩然。事情過咗兩個禮拜，呢位洋人先至姍姍來遲發表聲明，強調先辭職後接受新職位，仲話對事件造成關注感到抱歉喎。叮，佢會唔會甩大牙？你話呢！

謝卓飛究竟係咪辭職後至接受新職位，不如聽吓另一種講法喇。西九管理局踢爆，董事局同意謝卓飛離職前三日，即係一月四日，已經有獵頭公司搵過佢，要求佢考慮出任新職。換句話講，成件事疑點重重，謝卓飛好可能係未辭職先搵工，當知道自己好大機會獲英國文化協會聘用，就搵醫生紙作擋箭牌，向西九管理局請辭。

其實，謝卓飛究竟有冇病，只有佢自己知。老實講，一個人有心劈炮，有乜易搵藉口吖，搵醫生證明更加冇難度喇。退一步講，就算佢真係有病，都冇理由咁兒戲話走就走o架，你估細路仔玩泥沙咩。佢咁搞法，唔單止係玩弄西九管理局，直頭係玩弄全港市民，淨係講一句抱歉就算？豈有此理！

講真，呢位洋人一早就誠信破產。佢舊年八月履新時，係威係勢大談西九發展大計，點知張櫈仲未坐暖就劈炮唔撈，飛返倫敦祖家之後一去不回頭。最好笑嘅係，佢一連寄咗三張醫生證明返嚟，又話健康有問題，又話不適宜獨自居港，需要即時解約，講到好似病入膏肓咁。點知呢頭獲批離職，嗰頭就蟬過別枝，乜病都冇晒，依家仲生猛過老虎咁滯。

講到尾，成件事最瘀嘅係西九管理局。當初煞有介事全球招聘行政總裁，點知千揀萬揀，揀咗個爛燈盞，大拿拿幾百萬年薪請個洋人返嚟，以為只有洋和尚先至識唸經，連驗身都慳番，卒之畀人殺個措手不及，成為國際大笑話，真係丟晒香港架。

天要落雨，娘要嫁人，西九管理局成立兩年來，已有十五個人離職，流失率高達兩成半，計埋謝卓飛已走咗三個高層。事實證明，問題唔淨係出自謝卓飛身上，而係成個管理局都有問題，點解咁高人工仲留唔住人？睇嚟身兼管理局主席嘅唐英年真係要好好反省吓喇。

唉，港府好大喜功，吹水要將西九建成世界級文化藝術中心，點知噏咗十幾年仲係十畫未有一撇，依家連行政總裁都走埋，你話係咪笑話吖。計太一叮話齋，冇咁大個頭，唔好戴咁大頂帽，再咁搞落去，二百幾億元公帑遲早掟落鹹水海嘅咋，叮！