政情：朱繼陶憂亞洲經濟波動
日本發生8.9級大地震，世界震驚，太子珠寶鐘錶執董朱繼陶話，見到咁災難性嘅場面，自己都好難過，又擔心日本經濟波動影響亞洲地區。至於影響程度有幾大，就要睇救災嘅速度喎。
朱繼陶成日同仔女去日本旅行，仲最鍾意食仙台嘅燒牛脷，難怪咁傷感。嚟緊佢又要出門，今次係去參加一年一度嘅鐘錶界盛事「瑞士Basel World巴塞爾錶展」，講到以前啲鐘錶界老前輩去呢個展覽時，唔單止要自行租貨Van喺會場門口擺檔，仲可能畀人驅趕。
佢話港人轉數高，又識執生，最叻逆境自強，經過三十幾年努力，時至今日已經再冇畀人驅趕離場呢支歌仔，錶商去當地擺攤位展覽方便得多，加上貿發局去當地搞香港館協助港商，令香港鐘錶業得以蓬勃發展。