港府鼠目寸光 人才買少見少

孔聖人教落，鳥擇木，無木擇鳥。有本事嘅人只會揀可以發揮才智嘅地方落腳，如果揀錯，抱憾終身。廿一世紀樣樣靠食腦，人才優勢至係必殺技。全球各地都出盡法寶留住人才，爭奪人才。弊在港府自己冇腦，更唔識珍惜腦力資源，施政失誤引發中產移民潮，精英流失嚴重削弱競爭力，人才買少見少，香港想唔衰都難咯。

嗱，香港呢方面又輸畀對手新加坡嘞。香港大學社會工作及社會行政學系廿六個應屆畢業碩士生入面，五個已經畀新加坡撬走。對方提供嘅待遇優厚，唔止住房有津貼，連搬遷費都畀埋，加上當地無論教育制度、醫療保障同居住環境都好過香港，係人都知點揀啦。

仲有一樣香港根本冇得揮，就係政府施政嘞。正如有意移民新加坡嘅同學話齋，當地政府無論辦事效率定管治水平都勝一籌，相比之下，港府高官個個好似人肉錄音機咁，唔失望至奇啦。

星洲咄咄逼人，楓葉國同樣唔輸蝕。加拿大幾年前推出一項鼓勵技術移民計劃，到依家已經喺全球各地吸引咗近四十個行業超過廿八萬技術人才。另一個香港人移民熱點澳洲，亦推出類似計劃，甚至以「度身訂造」方式吸引專業人才。

人才爭奪戰愈來愈激烈，港府毫無招架之功。有本港研究機構舊年年底嘅調查發現，中產人才流失危機已經出現，近半受訪者話未來十年會移居海外。美國民調機構蓋洛普同期調查結果更得人驚，如果任由全球嘅人自由選擇，香港人才流入指數將會係負百分之廿八，即係話想離開嘅人才遠遠多過要嚟嘅。

人哋求才若渴，港府就捉到鹿唔識脫角。最典型係舊年推出嘅「香港博士研究生獎學金計劃」，呢筆以世界各地尖子學生為對象嘅獎學金，三年津貼合共七十五萬港幣，但居然冇規定尖子畢業後要留港工作，隨時拍拍屁股走人亦冇佢哋符。

睇番新加坡同英國，同類獎學金嘅受惠學生，畢業後至少要為當地公司工作三年，唔係就要回水，而香港就烏吓烏吓幫他人作嫁衣裳，簡直戇居到冇朋友。叮！

當今世界人才第一，乜都講求高科技。但港府鼠目寸光，雖然將創新科技列為六大產業之一，但係資源投入少之又少，連長遠規劃都冇，求其劃幅地起幾幢樓，再掛個「科學園」招牌，就算搞高科技。講到人才，連自己培養嘅人都留唔住，吸引外來專才更加係天方夜譚。

計太一叮話齋，良禽擇木而棲，賢臣擇主而侍，香港瓣瓣唔掂，直頭好似碌「枯木」咁，乜嘢良禽都飛走晒啦。叮！