政情：鄧肇殷係仁濟奶粉救星
全城陷入奶粉荒，但一班初為人父母嘅仁濟醫院總理就好淡定。點解？皆因總理中有卓悅美容集團高層Erica鄧肇殷，由於卓悅有賣奶粉，所以佢成為仁濟嘅奶粉救星。
育有一對未夠一歲龍鳳胎嘅仁濟副主席李文斌話，佢都係多得Erica幫手，先至長期有穩定嘅日本奶粉供應，而且仲提供埋貼身尿片，難怪佢太太Amanda何芷韻都話要代表BB寫張卡多謝Erica啦！
仁濟醫院日前舉行周年籌款晚宴，梳咗個靚髮型嘅Amanda同打扮入時嘅Erica，好似孖公仔咁現身，原來佢哋御用髮型師都係同一人，當日兩人就係Set完頭後一齊到場。
鄧肇殷（右）同何芷韻（左）情同姊妹，連御用髮型師都係同一人。