政情：扮嘢文父子開網上酒窖
蘭桂坊之父「扮嘢文」盛智文每日工作十幾粒鐘，每月喺泰國、香港、成都三地氹氹轉，當然忙碌嘅中環人唔止佢一個，但辛苦搵嚟自在食，美酒佳餚永遠都係減壓良方。隨住香港紅酒免稅成為集散地，紅酒生意做得愈嚟愈成功，佢就睇準時機，同囝囝一齊打造蘭桂坊紅酒王國，開設網上「LKF Wines」，網上酒窖會為忙碌嘅客人精挑細選限量版靚酒。
之不過，扮嘢文滴酒不沾，又點為客人推介好酒呢？佢好坦白咁話自己對品酒認識唔多，但係呢個缺點正係佢哋開設網上酒窖嘅重點，因為佢哋會將識酒同愛酒之人帶去網上平台，為愛酒之人大開方便之門，同時紅酒亦會供應畀佢旗下蘭桂坊逾十五間餐廳同酒吧，可謂肥水不流別人田。
注重健康嘅盛智文近年實行半素食，三餐以蔬菜同海鮮為主。