政情：彤叔捐助清華建醫學樓
香港唔少富豪好重視教育，近年中港交流頻繁，班富豪除咗捐錢畀香港嘅大學之外，仲會捐助內地嘅大學，支持內地大學嘅科研工作。人稱「彤叔」嘅新世界集團主席鄭裕彤，最近就透過旗下周大福慈善基金捐出八千五百萬元人民幣，畀北京清華大學醫學院興建醫學樓，尋日仲搞咗個奠基儀式添！
彤叔大仔、新世界發展董事總經理「純官」鄭家純，現身處北京出席政協會議，尋日佢就抽空出席奠基儀式。純官話周大福慈善基金一直以「取諸社會、用諸社會」為宗旨，而且好重視為國家培養人才同專才，捐款興建醫學樓就更加代表佢哋支持國家醫學研究嘅決心。