政情：踢走鬍鬚曾泛民歎慢板
鬍鬚曾發表史上最廢嘅預算案後，白鴿黨話會對佢提出不信任動議，想逼佢落台，但政治從來弔詭，據聞泛民主派之中，好多人唔想見鬍鬚曾政途就咁終結，想佢捱多一年半載。點解？
區議會選舉仲有八個月就殺到，依家鬍鬚曾係民主派代市民出氣嘅大沙包，只要佢繼續留喺政府裏面獻世，年底區議會選舉泛民就有藉口爆鬧政府。
不過，泛民心底唔想鬍鬚曾喺清明之前一命嗚呼，唔代表鬍鬚曾就可以捱得過中秋。據聞，建制派對鬍鬚曾相當不滿，直指佢自製預算案政治炸彈，炸死自己之餘，仲殃及建制派，無形中為民主派搶攻區選送上大批彈藥。依家北京開緊人大、政協「兩會」，建制派可能已經密集式向中央打鬍鬚曾小報告，阿爺隨時早過泛民叫鬍鬚曾落台。