政情：甄文達教新民黨員宣傳
喺新民黨嘅顧問團當中，有個另類星級人馬，就係憑烹飪節目《Yan Can Cook》成為西方人眼中中國菜代表人物嘅甄文達嘞，可惜佢長居美國，連年初嘅創黨儀式都冇現身，否則當日可能多好多主婦fans捧場都未定。近日阿Yan路過香江，幾忙都抽時間搞場講座，同黨員分享個人嘅宣傳推廣技巧同管理哲學。
咁黨主席葉劉淑儀同阿Yan點相識㗎？葉劉話年前喺美國史丹福大學進修時，經常一路玩健身、一路睇《Yan Can Cook》，算係阿Yan半個fans，幾個月前透過朋友互相結識。今次偶像一場嚟到，葉劉盡地主之誼請阿Yan去食飯洗塵，兼親手補送黨徽襟章同個人嘅中英文著作，阿Yan仲興致勃勃咁翻閱葉劉嘅大作添！政治同烹飪其中一個共通之處就係炒作，睇嚟佢哋都好夾噃。