政情：唐唐紅酒飯局白鴿唔騷

正如全國人大常委范徐麗泰所言，特區政府最近多災多難，「史上最廢」嘅預算案引爆嘅炸彈爆完一個又一個，連政府臨時撥款議案都落得觸礁收場。煲呔曾同財爺鬍鬚曾忙於撲火，疲於奔命，但政務司司長唐唐就闊佬懶理，由禮拜二休假到十三號至返工。

唐唐唔單止隱形，竟然仲聽聞佢約咗白鴿黨全數立法會議員同大部分中委，今晚上佢官邸共晉晚餐，風花雪月飲紅酒。條條fing到佢吖！喺政府多事之秋，佢竟然大模廝樣同政治敵人摸杯底碰酒杯，咁就有問題喇！

消息話，唐唐同白鴿黨呢餐飯已經約好一段日子，就算預算案後，泛民向鬍鬚曾開戰，都無意改期，直到前日泛民玩突襲，令政府嘅臨時撥款議案遭否決，白鴿黨同政府關係變僵，事態就出現急劇變化。白鴿黨高層認為兩軍交戰，不談風月，呢個時候同唐唐食飯，面左左場面尷尬少不免，搞唔好仲隨時惹人揣測有枱底交易，於是臨時決定取消約會，請唐唐食檸檬。

休假避唔到政治炸彈

白鴿黨主席鐵頭仁證實，費事餐飯背脊骨落，已經主動通知政務司司長辦公室取消約會嘅決定。鐵頭仁解釋，本來飯局嘅性質都係聯誼性質，雙方風花雪月一番，冇特別嘢要傾，取消咗都唔可惜，至於幾時補食呢一餐，佢話遲啲再算喎。

預算案觸發連串政治炸彈，孖曾萬箭穿心，尤其係鬍鬚曾，變成全城喊打嘅眾矢之的，唐唐選擇喺呢個時候休假擺明係錫身，想同孖曾劃清界線。依家白鴿黨同政府全面開戰，掉番轉頭，同唐唐劃清界線，取消飯局，唔知算唔算世界輪流轉呢？其實，如果唐唐以為自己可以喺呢場預算案風波中置身事外，實在太天真喇，正所謂「皮之不存，毛將焉附」？唐唐係司長，泛民又點會放過佢吖，白鴿黨唔領情食呢餐風流飯，話唔定就係向佢開戰嘅先兆！