減廢齋噏唔做 回收拖得就拖

立法會啱啱通過嘅「剝光豬版」停車熄匙條例草案，呢度讓步，嗰度豁免，擾民有餘，效果成疑。無計啦，港府環保當做騷，根本就冇誠意，好似源頭減廢回收咁，獨沽一味拖字訣，一事無成。

呢，本港每日產生過萬噸都市固體垃圾，堆填區早已經不勝負荷，如果唔透過生產者責任制同垃圾徵費呢類措施，從源頭開始減少廢物，香港遲早要變大垃圾缸。弊在當局淨係識用堆填同焚化處理呢兩招，減廢回收拖得就拖，造成嘅公帑浪費更加高達數億。直頭係倒納稅人米。叮！

有環保組織翻政府舊帳，踢爆環保署廢物管理政策拖延情況嚴重。舉個典型例子，早喺八九年，當時嘅規劃環境地政司班禮士出咗份叫《對抗污染莫遲疑》嘅白皮書，話本港人口同廢物量增長不成比例，要設法解決。當局九八年亦已經建議起堆肥廠。

點知莫遲疑變咗盡量拖，堆肥廠最快要到二○一四年至喺大嶼山小蠔灣落成啟用，足足拖咗十六年，問你服未！環保組織負責人狠批環境局局長邱騰華，上任以來未有履行前環境及工務局局長廖秀冬早喺○五年就提出嘅減廢方案，令人擔心呢個看守政府根本冇誠意喺任內推動減廢。

同樣離譜嘅係，根據○二年嘅審計報告，早喺九六年已經有顧問報告指出，從源頭減少廢物嘅處理成本較低。如果港府落實顧問報告嘅建議，由○七年起每年可以慳番七億元廢物管理成本，照咁計法，到家陣已經累積慳咗廿八億，足夠為四萬六千幾個標準綜援四人家庭「出雙糧」。

當局捉到鹿唔識脫角，一味掛住推銷焚化爐同堆填區，本末倒置，九唔搭八。之不過，政府咁做其實一啲都唔出奇。你知啦，班高官一向縮骨，做嘢捨難取易，源頭減廢容易引起反對聲音，梗係可免則免，揀焚化同堆填啦，只要唔影響仕途，話之你嘥幾多公帑。叮！

環保署回應話，減廢回收係政府三個重要政策方向之一，不過現階段會先集中處理購物膠袋同廢電器電子產品兩個強制性生產者責任制計劃喎。太一叮諗極都唔明，既然減廢係重要政策方向，點解仲要繼續拖？係實在太忙吖，定扮忙玩拖延？仲要拖到幾時？

睇下鄰近嘅廣州，同樣面對「垃圾圍城」，但人哋坐言起行，下個月起開始實施強制性垃圾分類，違例者罰款五十蚊人仔。正所謂，人比人比死人，難為港府班高官仲吹水唔抹嘴，廢噏「綠色香港，你我共創」，計太一叮話齋，應該叫廢官減廢，廢咗啲廢官。叮！