政情：徐立之晒古董世盃戰靴
尋日係香港大學同香港中文大學教職員較勁，競逐兩大校長盃，最終中大以四比二贏港大奪盃，但兩大校長徐立之同沈祖堯都冇落場踢波，只係做啦啦隊，喺場邊吹吓水。
雖然港大輸波，但徐校長都睇得好肉緊，仲帶埋對收藏三十七年嘅一九七四年世界盃版足球鞋嚟贈興。佢話七十年代喺美國做研究時，間唔中都有跟南美人士踢吓斯文波，仲趁世界盃熱買咗對世盃版名牌波鞋，佢拎住波鞋話當時月薪三百五十美金，對波鞋都七十美金，都幾貴。徐立之係中大校友，但做咗港大校長，情況同沈祖堯啱啱掉轉，佢哋話兩隊波應該互換到對方隊伍守龍門，然後互相放水，咁就有球必應喇！
對波鞋買咗三十七年，徐立之話當時賣成七十美金咁貴。
徐立之（左）同沈祖堯主持開球禮。