政情：茉莉驚魂KK被公安搜身
由網民發動嘅「中國茉莉花革命」搞到內地草木皆兵。正在召開全國人大、政協「兩會」嘅北京更加處處杯弓蛇影，港區全國人大代表KK黃國健前晚下榻北京飯店時，就因一時不慎變成「疑犯」，被公安搜身。KK慨嘆做咗九年人大，被公安搜身都係第一次！
立法會前日三讀通過明年立法會選舉修例，KK先啟程上京，點知當晚入到北飯，保安森嚴，人大都冇面畀，要接受安檢。
佢以為循例手續嚟啫，無為意就咁行過金屬檢測機，點知腰間條皮帶有金屬扣，警報隨即響起，在場公安如臨大敵，當佢係犯咁搜身，搞咗一輪，證實KK身上無可疑物品先至放人兼放行。
KK話以前開兩會，只要心口掛住人大證件，就喺北飯通行無阻，諗唔到今年關卡重重，直指內地當局有啲神經過敏，話：「如果人大都信唔過，仲信得邊個？」
黃國健