政情：梁孭賢撲火鬼祟上前線

公立醫院醫生為人手流失、工作量爆煲嘅怒潮一發不可收拾。各醫院聯網嘅醫生最近都陸續發火，齊齊炮轟當局無視問題，搞到醫院管理局行政總裁PY梁栢賢頭都大埋，要四處撲火，親身落唔同醫院開會，平息前線醫生嘅怨氣，但怒火仍然未撲熄。

PY尋日出席香港醫學博物館舉辦嘅籌款步行活動時，仲畀主禮嘉賓之一嘅發展局局長林鄭月娥揶揄，指在場有唔少醫生組織代表出席，包括衞生署、香港大學醫科生及部分醫院聯網代表等，反映醫學界相當齊心，仲話醫生最近組織起上嚟真係唔嘢小，笑指都搞到PY呢排好頭痛。PY聽到呢番話後，當場面紅耳熱，非常尷尬，事後被問及有乜嘢回應，淨係識得笑而不答。雖然多次為前線降溫，但似乎效果麻麻，PY膽粗粗，決定呢個星期落醫院睇前線醫生晚上值班嘅情況。

費事嚇親醫生病人

點解淨係揀夜探醫院呢，難道唔見得光？話說本身係澳洲醫科畢業嘅佢，一九八五年加入政府後，喺衞生署、醫管局只負責統籌及管理嘅工作，冇做過臨床職務。佢尋日同記者講自己冇臨床經驗，所以唔敢貿然去前線分擔工作，只係去視察吓實際情況，了解前線員工有幾辛酸，佢叫大家唔好誤會佢會落手落腳，費事嚇壞前線醫生同病人。

嚇壞前線醫生同病人只係門面說話，但潛台詞係驚班醫護人員嫌佢阻手阻腳就真。

PY又透露當局正構思成立特別小組，收集各院、不同專科嘅醫生工作量同工時數據，成員由各科醫生、專科學院及大學代表組成，共同研究一條方程式，去公平分配今年七月醫科畢業生人手，尤其係人手需求較大嘅內科、急症科同兒科等，紓緩緊張需求喎！新官上任，希望PY臨危不亂，可以拆彈喇！