政情：搞搞政：鐵頭仁多口辣慶譚Sir

立法會尋日繼續辯論政改方案嘅立法會選舉辦法，白鴿黨又畀激進泛民算舊帳，揶揄佢哋歸晒邊，連續四日畀社民連同人民力量圍剿，黨主席鐵頭仁畀人砌咗咁耐，梗係又激又氣，輪到佢發言時終於發威，向人民力量黃毓民還擊，不過，佢一開波就周圍踢，仲辣着民建聯添，結果，建仔主席譚耀宗即時彈起身還拖。

到底鐵頭仁講咗乜嘢？話說白鴿黨提出修訂，建議將超級區會議席嘅門檻由十五人降至十人，但未獲建仔支持，鐵頭仁於是斥責民建聯此舉係怕分薄票源，對佢哋冇膽接受挑戰感到失望，仲話既然佢哋覺得將提名門檻訂喺十至十五人都可接受，應「與人為善」，支持調低門檻哦。

譚Sir一聽到呢句「與人為善」，即時嬲到彈起身好激動話，選舉根本冇數講，如果白鴿黨咁「與人為善」，大可將啲提名、甚至選票分晒畀社民連及人民力量，譚Sir跟住自爆，本來對白鴿黨被圍攻都深表同情，亦諗住幫民主黨反駁黃毓民，但係鐵頭仁一句「與人為善」，咪係咁先囉！