政情：哪吒埋發叔堆出戰新東

有「哪吒」之稱嘅西貢區議員方國珊退出自由黨後，最近拉攏數十名專業人士成立「專業動力」，似乎想以專業「旗號」殺出血路。不過，建制派消息指，呢啲好有可能只係煙幕，實情過往主力開拓將軍澳票源嘅哪吒，已經埋咗「新界王」劉皇發堆，打算結合鄉事票，揮軍明年立法會新界東議席。

發叔冇可能零成本畀票佢㗎，據了解呢個應該係經濟動力向哪吒下訂婚聘書嘅代價，因為哪吒同經濟動力唔會急於「結合」，預計年底區議會選舉之前，雙方都會維持「各自搵食」姿態，到哪吒喺區選勝出，證明有力問鼎明年立法會選舉，先至一拍即合。

屆時，新界東嘅鄉事票，將會三分天下，部分照舊投畀民建聯，發叔「嫡系」勢力就歸邊撐哪吒，而富貴黨喺新東鄉事經營多年，亦有堅定支持者，但數量應該比前兩者都要少。佢哋可唔可以如願都好難講，事關新東戰雲密布，變數仲好多。