政情：陳茂波經典歌詞教理財

理財係一門人生學問，尋日保險界議員陳健波喺立法會提咗項推動個人理財教育嘅議案，唔少議員發言時都趁機懷舊一番，仲唔多唔少睇到佢哋嘅理財哲學，簡單講，會計界嘅陳茂波係投資派，勞工界嘅潘佩璆、王國興就係穩陣派。

陳茂波發言好感性，佢朗讀當年銀行鼓勵市民儲錢嘅廣告歌歌詞：「小莫小於水滴，漸成大海汪洋，細莫細於沙粒，漸成宇宙四方」，又話自己工作幾十年，回頭才發現淨係儲錢唔夠，一定要有好嘅理財計劃，寄語身處金錢掛帥社會嘅年輕人，可以學懂正確嘅金錢價值觀。

工聯會王國興及潘佩璆亦有同感，興哥話以前「儲蓄可致富，節儉可興家」，時移勢易，取而代之係「卡冚卡，先使未來錢」嘅觀念。潘佩璆更加愈講愈㷫，批評銀行宣傳年輕人唔夠錢結婚、擺酒、度蜜月都去借，總之乜都係「借借借」，周身債點可能輕身上路呢？