政情：黑英轟孫公直言冇交情
鬍鬚高官今年周身蟻。講緊嘅係財爺鬍鬚曾同教育局局長孫明揚，呢輪佢哋兩個因為預算案同學校減班政策，一個掀起全港憤怒，一個掀起學界憤怒；一個引起連場抗爭，一個又可能面對名校舊生司法覆核官司，最弊嘅仲係兩個都畀人叫落台，佢哋不約而同畀人剃鬚，唔通今年流年不利留鬚？
孫公雖然有官場拆彈高手之譽，但佢今次嘅對手卻係前天文台台長林超英，黑英尋日講到明雖然曾經同在官場，但孫公並唔識佢，換言之彼此冇乜交情。性格耿直嘅黑英尋日一再解釋點解咁不滿孫公同教育局嘅政策，火力之猛，近年少見，孫公呢次真係老貓燒鬚，或者係畀人剃晒撇鬚。
另一個鬍鬚佬亦唔好過，事關今日大把人上街反對預算案，照咁睇嚟，鬍鬚曾撇鬚都好快畀人剃晒。