政情：政黨社福界吼實$6000

補鑊版預算案宣布派錢六千蚊，財爺鬍鬚曾向民意跪低嘅姿態惹來好多討論，港人茶餘飯後討論最多嘅都係幾時有六千蚊？點樣使好？繼商界大搞六千蚊消費套餐外，社福界亦部署宣傳活動呼籲市民捐款，估唔到政界都見錢眼開，尋日李卓人以支聯會新主席身份出席電台節目時，就明言對今年籌款好有信心，皆因市民手上有政府派發嘅六千蚊喎！

第二季難到市民手

市民仲未攞到呢筆意外之財，各界已經虎視眈眈，希望咬之而後快。側聞幾大政黨都打緊算盤，事關今明兩年都有大型選舉，年底嘅區議會選舉更係一場戰線特大嘅盛事，偏偏政壇大玩合久必分、分久必合，從白鴿黨、社民連分裂出嚟嘅勢力都可謂一窮二白，點會唔吼住呢筆意外之財呢？

不過，商界想搞套餐、社福界想港人大發善心都好，一切仲要睇鬍鬚曾幾時公布細節，同埋錢幾時落到市民手。政圈消息話，以過去政府辦事議而不決嘅作風，再加上今次派錢規模太大，點樣攞？點樣鑑別身份？境內境外都係問題多多，市民想喺第二季攞到錢嘅希望好渺茫，如果係咁，政圈嘅如意算盤真係未必打得響。

以阿人代表嘅支聯會為例，每年搞籌款嘅最大一場騷就係六四晚會，事實上，呢個場合亦係泛民多個團體趁機吸水嘅地方，如果嗰日之前市民都攞唔到錢，捐款都好難大升啫。其他政黨亦一樣，如果政府遲遲唔派錢，距離區議會選舉嘅時間就愈嚟愈近，政黨最終都係要赤膊上陣，所以話，鬍鬚曾幾時做嘢，真係大把人牛咁眼吼住㗎！