報廢疫苗 處理兒戲 累BB捱多一針

一百一十六名被注射報廢疫苗、無辜要再捱一針的市民或兒童家長，前晚陸續接獲通知，安排最快昨日到診所補打疫苗。有在柏立基夫人母嬰健康院接種報廢肺炎球菌疫苗的兒童家長炮轟，批發商處理報廢疫苗的程序非常兒戲，「如果啲疫苗係有菌而要報廢，咁打咗落ＢＢ度咪好大鑊！」

甄太的兩個月大女兒楹楹，是三十八名在柏立基夫人母嬰健康院接種了報廢肺炎球菌疫苗的兒童之一。甄太前晚接獲藥廠電話通知，「佢話嗰批針處理不當，我初時好驚，驚打咗啲菌入BB度，之後佢解釋話只係擔心無藥效，要再打多次。」甄太覺得批發商很兒戲，「藥嘅嘢如果有菌可以好大件事」，希望當局調查清楚。

家長：有事可追究邊個？

甄太對於楹楹白捱一針十分心痛，「BB上次支針一打落大髀已經尖叫，跟住又喊、又哀鳴咗三、四分鐘，出世兩個月都未試過喊到成塊面紅晒，好淒涼！我都戥佢痛！」

昨日有數十名兒童獲通知到柏立基夫人母嬰健康院補打疫苗。帶同十三個月大女兒補打針的宏太說當初十分擔心，「人命嚟㗎嘛，何況係我個女，醫護人員解釋冇副作用、冇生命危險先放心咋。」施氏夫婦亦帶同十三個月大女兒補打針，但檢查後發現女兒發燒，需轉介東區醫院再作評估，施先生稱當然擔心，「冇事猶自可，有事可以追究邊個呀？」

本身是兒科專科醫生的香港醫學會前會長謝鴻興稱，「要調查清楚今次事件係邊個運輸環節出問題，單睇疫苗外表係睇唔出有冇問題。」

涉事生產商葛蘭素史克藥廠強調，事件屬批發商裕利醫藥有限公司的人為錯誤，誤將報廢疫苗再推出市面。葛蘭素已通知接種了一百一十六劑報廢疫苗的市民，並於昨完成回收剩餘的一百四十四劑疫苗。至於裕利醫藥有限公司，其鰂魚涌及灣仔辦公室昨日休息。