飛鵝夜景夠靚 配套不足靠害

牆裏開花牆外香，香港有唔少好嘢，自己人唔識欣賞，經常要等到外國人讚好，先至會珍惜。例如理工大學年前研發出一款電動車，港府唔識寶，搞到肥水流入別人田，被外國人捷足先登攞去開發，香港白白浪費咗一個黃金商機。

最搞笑嘅係，連香港嘅景觀都要外國人讚靚，港府先至識欣賞。呢，日本有間旅行社舊年搞咗項網上調查，香港夜景被選為全球「最令人印象深刻的夜景」及「擁有最美麗夜景的地方」，飛鵝山更力壓美國拉斯維加斯等地，榮登全球最美夜景觀賞之地添，都咪話唔巴閉。

話時話，香港素有東方之珠美譽，獲此殊榮可以講係實至名歸。查實，除咗飛鵝山，本港仲有唔少欣賞夜景嘅好地方，例如太平山頂、司徒拔道觀景台、龍翔道觀景台、青馬大橋觀景台、落馬洲觀景台等等，都唔差㗎。事實證明，只要識得包裝，識得推介，就唔憂吸引唔到旅客。

果然，飛鵝山被日本人睇中之後，當堂身價百倍，旅發局拿拿臨推出飛鵝山觀景行程試驗計劃，希望吸引更多外地旅客咁話。本來呢，打鐵要趁熱，利用外國傳媒宣傳香港嘅機會推動旅遊業發展，係無可厚非嘅，弊就弊在當局眼高手低，淨係識得攞威，但就唔識發揮，結果由於安全配套設施不足，陷阱處處，所謂觀景行程，幾乎要搵命博咁滯，唔怪得被轟「搵旅客條命較飛」喇。

本報記者實地睇過，飛鵝山夜景無疑係好靚，可惜乜嘢配套設施都冇，目前根本唔適合作為旅遊景點。先睇吓道路，上落山三條小路都係單程路，又窄又彎又斜，隔幾百米先至有一個避車處。最危險嘅係，路邊防撞欄殘缺不全，路燈又唔夠，能見度只有大約五個車位，如果碰到大霧天時，路面濕滑，一個緊急煞車隨時碌落山底，問你怕未。

咪以為太一叮靠嚇，呢度已經發生過多次意外㗎喇。○九年，有人揸車上飛鵝山兜風，回程時遇上大霧，連人帶車碌落七十米深嘅山坡，好彩有小樹同碎石擋咗一擋，只係雙手受傷，執番身彩，不過架車就變咗廢鐵咯。

太一叮始終諗唔明，既然當局雄心勃勃，要將飛鵝山打造成旅遊景點，咁點解唔先搞好配套設施呢？其實，飛鵝山除咗安全設施嚴重缺乏，其他配套例如觀景台、泊車位、洗手間等亦嚴重不足，當局翹埋雙手乜都唔做，就話要帶外國旅客上去睇夜景，簡直係靠害。立法會議員就講得啱嘞，飛鵝山目前嘅配套根本唔適合搞旅行團遊覽，除非有人想搵刺激喇，不過，呢種刺激唔搵好過搵，叮！