政情：搞搞政：湯彥麟教市民善用$6000
財爺鬍鬚曾日前跪低人人派六千蚊，好多人都諗緊點使好。
已辭職準備另謀高就嘅國泰航空行政總裁Tony湯彥麟，尋日親自簡介國泰推出多項優惠。講起政府大派六千蚊喎，佢就好醒目咁教市民點使，話最好當然係即刻登上國泰網頁訂特惠機票，成家人一齊外遊玩餐飽喎！嘩！臨別秋波都幫公司咁硬銷，真係無孔不入。
咁佢點用六千蚊呢？Tony話今個月三十號係佢任職國泰最後一日，會好快離開香港，去外國出任國際航空運輸協會理事長一職，可能都未必等到收錢喎，但如果有幸收到，都會捐咗佢做善事。
