政情：孖曾帶難唐唐照去Hea

因為財爺鬍鬚曾嗰份史上最廢嘅預算案搞到天怒人怨，泛民主派發動「預算案革命」，呼籲市民聽日上街反預算案，雖然鬍鬚曾為「大佬」煲呔曾上京撲火，急急跪低仲公布埋人人六千蚊嘅派錢方案，但民憤難平，好多市民話錢照收、街照上，新移民更指摘政府歧視，唔排除提出司法覆核添，若果聽日有數以萬人或十萬人上街嘅話，怒潮隨即席捲北京，孖曾肯定有難。

失管治威信隨時車毀人亡

孖曾大難當前，但問責團隊中就有人睬你都傻。邊個？咪就係平時做嘢「條條fing」嘅政務司司長唐唐囉！政府尋日刊憲，話唐唐喺今日開始休假，放足八日，十三號至返工，而佢個位就由教育局局長孫明揚兼任。

唐唐身兼西九管理局董事局主席，尋日走出嚟公布管理局選定Norman Foster嘅設計後，好多環保同藝術團體都對呢個決定好有意見，而中選嘅公司亦極具爭議性，乜佢冇諗過花啲時間去聽吓意見或者向公眾釋除疑團先嘅咩？竟然撒手不管匆匆休假去矣！咁仲算做好佢份工？

正如作為政府智囊嘅中央政策組首席顧問劉兆佳，日前喺北京話香港嘅官民關係已到臨界點，唐唐竟然揀喺咁嚴峻嘅時刻，仲喺「預算案革命」嘅前夕放假，好明顯係為避遊行啦。

唐唐之前鬧「80後」嗰番「車毀人亡」論，搞到民望插水，而依家孖曾嘅民望可謂低處未見低，又因面臨史上最廢預算案而打擊管治威信，可能隨時「車毀人亡」，但唐唐就縮埋一邊，一於懶理，照樣放假，擺明係乜都唔想做。

老實講，問責高官口口聲聲話團隊精神，政制及內地事務局局長「林公公」林瑞麟早前就踢爆，瞓覺就係問責官員嘅團隊精神。查實邊有團隊精神吖，睇吓唐唐就知啦！應該係話大難臨頭各自飛先啱。