通識題九唔搭八 學生哥無所適從

政府成日話，教學改革底線係要「讓學生愉快」，講吓就得。弊在教改處處辣着火頭，愈改學校愈亂，愈改教師愈辛苦，愈改同學愈係喊咁口。

呢，好似通識教育咁，新嘅中學文憑考試明年開波，新學制下嘅通識科，直頭好似專門同老師同學過唔去咁，無論教材定係試題，無厘頭到暈，問題多到不堪。老師唔知點教，同學更加唔識點答。通識通識，到頭嚟通通唔識，你話係咪盞搞吖。

有中學生實在頂唔順，喺社交網站建立群組，踢爆目前通識科嘅種種弊病，甚至將教材同試卷上載。「問題教材」唔睇猶自可，一睇嚇一跳，分分鐘當場暈低都似。

呢嗱，某學校中一通識科工作紙要求學生討論各種行為係愛國表現，定係同愛國毫無關係。討論本身已經好無聊，而所謂答案就更加無聊。教科書明明話，愛國並無具體嘅定義，即係點解釋都得，但老師偏要提供具體答案，話「出席『十一』煙花匯演」同「學好普通話」等，都係愛國表現，問你服未。

咁都得？香港地唔識「煲冬瓜」嘅人通街都係，大把人十月一日冇興趣睇煙花匯演，唔通佢哋統統都唔愛國，要被打入另冊？唔怪得咁嘅通識教育被人質疑係「洗腦教育」咯。

另外有一份某中學中五通識科測驗卷，題目講嘅係「法治精神」，但試卷嘅漫畫資料所用字眼，同議題完全無關，一個講東一個講西，九唔搭八，直頭大纜都扯唔埋。通識科本來已經題材廣泛，仲加埋有誤導嫌疑嘅字眼，叫同學點答吖？

叮！同學睇到思維亂，教師睇到頭都暈。有老師話，好多通識題目答案視乎觀點角度，硬係要有「正確答案」，反而局限咗同學嘅獨立思考，有百害而無一利。

阿茂整餅，冇嗰樣整嗰樣，唔止玩殘學生，連教師亦深受其害。通識科嘅特性就係天天新款，日日折舊，議題出咗好快就唔啱用。老師備課同準備補充材料，已經忙到一頭煙，仲要改埋啲題材超無厘頭嘅試卷，直頭就係攞命，教學質量又點保障吖？

通識科從課程到考評完全係有別於其他學科嘅新鮮事物，當局未有做好充足準備就匆匆推行，結果老師愈教愈冇癮，同學愈學愈辛苦。有教育界人士講得一啲都冇錯，同學學唔落去要投訴，唔係老師嘅錯，係機制出咗問題。

通識題九唔搭八，學生哥無所適從。計太一叮話齋，教育官員成日話「求學不是求分數」，唔該咪再做阿茂，整埋啲騎呢古怪「改革」獻世咯，等老師愉快教學，學生愉快讀書好過啦。叮！