政情：立會保安阿頭頂唔順劈炮
喺舊年十一月講過，工作愈來愈難頂嘅立法會保安一度怨氣沖天，幾近爆發工業行動，但隨着屬警司級人物嘅黃培昌喺十二月出任總保安主任，秘書處再增添人手後，怨氣稍為退減。但黃培昌返咗工一個月多啲就遞信辭職，秘書處話鑑於佢未滿六個月試用期，所以只需要一個月通知就可以走人，要臨急請人相當頭痕。
據聞黃培昌跳船，係有感立法會新大樓工作繁重，遠比佢想像中厲害。其實當初秘書處請佢返嚟嘅重任，就係搞掂好新大樓嘅保安工作，可能新大樓嘅搬遷不容有失，所以對佢構成唔小壓力。政府無能搞到民怨沸騰，議員為選票乜都肯制，乜都攞嚟掟，保安員為保護官員經常無辜受傷，睇嚟都不無關係。另有傳聞話黃培昌私下感慨打立法會份工犧牲唔少，因為立會份工九萬元月薪，犧牲咗佢每月四萬多元長糧，故提早走人。