政情：黑英插孫公唔知學生苦
新學年嘅中一學額隨時減凸，學生或被迫跨區上學。不過，教育局局長孫明揚前日竟然話學生跨區上學唔係問題，又話中西區跨區去灣仔，搭港鐵只係十幾二十分鐘，結果畀人鬧爆，當中包括近期因縮班同孫公撐到行嘅英皇書院校友兼天文台前台長「黑英」林超英。
黑英尋日再就跨區上學問題喺網誌撰文，狠批孫公唔識香港地理，佢話「港鐵港島線的西端終點站是上環，港鐵並不服務西區的西營盤、石塘咀、堅尼地城，住喺呢度嘅同學要搭電車或巴士往灣仔或東區」，更質疑「高高在上的官員怎會知道基層的實況」，暗寸孫公閂埋門做事，不知民情。佢又點出「原區就讀」係當年教育當局經過長期積累經驗後形成嘅政策，但今日一個忽然擔任教育政策嘅官員，輕描淡寫嘅一句「跨區上學不是問題」，就將前人辛苦經營嘅政策銷毀於無形！