政情：搞搞政：議員粟米斑塊飯都噏錯

財爺鬍鬚曾因為粟米斑塊飯唔知價激起民憤，但原來啲尊貴嘅立法會議員都唔好得佢幾多。

立法會尋日休會辯論針對公職人員嘅暴力行為，身為動議人嘅經濟動力林健鋒，發言時都提及大熱嘅粟米斑塊飯，但就講成粟米石斑飯。嘩！普通碟頭飯即刻升格做高級海鮮喎！唔通上等人腦裏面諗嘅都係貴價嘢？

但係白鴿黨黨主席「鐵頭仁」何俊仁就好離譜，竟然將斑塊講成肉斑，碟飯即時變做矜貴不知幾多倍嘅粟米肉斑飯，竟然魚塊、肉塊不分。除佢哋之外，就連前日拎住盒粟米斑塊飯向煲呔曾抗議嘅社民連「長毛」梁國雄亦都講錯做粟米石斑飯。莫非粟米斑塊飯個名好難記？

講番煲呔曾疑似畀人撞傷單嘢，鐵頭仁尋日就話自己都年輕過，三、四十年前更加試過上街示威同人衝撞，但當年自己體態輕盈、身手靈活，所以冇畀人捉到喎，反而身邊一位身高五呎九吋嘅示威者就畀人拉咗，做咗佢嘅替死鬼。