政情：KK烽煙甩底畀主持鬧爆

預算案風波日日有新發展，工聯會黨團召集人「KK」黃國健本來答應電台同電視台尋日進行電話訪問，點知朝早起身發現手機壞咗，電台同電視台聯絡唔到佢，最慘就算即時去買部新手機，用番舊手機張卡一樣啟動唔到，內藏嘅電話號碼無法顯現，想主動「報案」都唔得。結果，成朝早打鑼都搵唔到KK嘅電台節目主持人，喺大氣電波批評KK玩失蹤，唔敢面對群眾。

KK花錢換手機，荷包已經受傷，仲要畀人鬧，真係啞子食黃連，有苦自己知。佢無奈咁話自己一向牙齒當金使，今次「甩底」事件，全因被手機壞機累事，仲特別託記者向各界朋友轉告，如果尋日聯絡唔到佢，絕非佢為人高竇或做無尾飛陀喎！