政情：煲呔曾瘀事 李明逵寸碎料

警隊前一哥李明逵尋日「孭鑊」入中大？孭鑊？佢都退咗休咁多年喇，仲有乜黑鑊要孭？眾所周知，以前揸槍嘅李明逵退休後更加專注廚藝，揸鑊鏟好拿手。依家中大前校長劉遵義有味拿手煎牛扒秘技，但現任校長沈祖堯向來揸醫生聽筒多過揸鑊鏟，於是佢搵咗識煮又識食嘅中大校董兼校友嘅前一哥返母校，喺中大職員飯堂獻技，表演煎餃子同烚餃子，前一哥仲孭埋個私家平底鑊去。

嗱！名副其實「孭鑊」！搞下gag啫，但佢帶埋私家鑊嚟，睇怕都係用慣咗，得心應手啲。

對傳媒先係大事

煲呔曾前日畀人撞到心口隱隱作痛，咁啱遇到前一哥，梗係問下佢對呢單嘢有乜意見，係咪有保安漏洞呢？佢隨即反問記者有關事件算唔算大件事，記者就話煲呔曾話畀人撞到瘀咗，仲去醫院驗傷喎，仲唔大件事？前一哥嘅回應係，對傳媒嚟講先係大事啫！

若果大家仲記得嘅話，喺十三年幾前，香港九七回歸當日，喺回歸典禮場地外嘅示威區聚集大批請願人士，而當時仲未做一哥嘅李明逵就大播交響樂，聲音仲蓋過示威者嘅叫囂聲，可謂危機處理有法，依家雖然退咗休，但仲做緊義工，培訓內地管理層級公務員，教佢哋處理大型事件同危機管理。所以，聽前一哥咁講，莫非係暗寸煲呔曾被撞係芝麻綠豆小事，只係煲呔曾小題大做？

不過，前一哥自言已退休五年，所以單嘢唔關佢事喎。咁又係嘅，無謂為咗煲呔曾而捲入政治漩渦吖！

講番包餃子，前一哥自稱由細包到大，個多小時就包咗二百隻餃子，煮餃子都難唔到佢，煮到咁上下，佢徒手攞起鑊中熱辣辣嘅餃子，睇下個底煎得靚唔靚添。

活動完結後，佢仲主動孭番隻私家鑊離開，仲笑笑口話：「留低隻鑊喺人哋學校就唔好啦！」咁識為人着想，難怪佢走嗰陣，教職員排咗條人龍要同佢影相留念喇！