平時漠視逃亡潮 醫局撲火杰撻撻

醫管局高層不嬲閉門造車,呢點冇人會懷疑。奇就奇在,佢哋近日忽然轉咗性,空群而出去聽醫生訴苦,仲一日跑幾場添。

點解呢班高高在上嘅高官會忽然親民嘅呢?長話短說,本港公立醫院不斷爆發醫生逃亡潮,一浪高過一浪,前線醫生人手買少見少,做到抖唔到氣,而醫管局袖手旁觀,冇採取任何措施補救。醫生團體忍無可忍,決定舉行聲討大會,仲提出六大訴求,包括加快晉升速度、增設額外當值津貼、公開人手安排等,仲講到明如果局方提唔出改善藍圖,就要採取進一步工業行動,包括靜坐等。

食衞局局長周一嶽先至識驚,拿拿臨做番場親民騷,同醫管局主席胡定旭、行政總裁梁栢賢分頭出動,又巡視醫院,又同醫生團體開會,千方百計要挽回民心。咁樣臨渴挖井已經夠滑稽啦,更戇居嘅係病急亂投醫,比如人哋話前線人手唔夠,周一嶽諗都唔諗,就話叫高層醫生做埋一份,真係九唔搭八。正如醫生團體話齋,咁做唔單止冇辦法為逃亡潮止血,仲會拖垮公共醫療系統。

其實,要堵截醫生逃亡潮都唔係冇辦法嘅,只要對症落藥就得嘞。話時話,咁多醫生蟬過別枝,都多得醫管局資源錯配。前線人手本來就掹掹緊,加上私營醫院高薪挖角,人手更加唔夠。醫管局又唔及時補足人手,搞到留低嘅醫生工作量大增,做到得閒死唔得閒病,惟有走得快好世界。

講開又講,家陣公立醫院真係冇乜值得醫生留戀,同私營醫院醫生比,薪酬低、工時長已不在話下,最令佢哋反感嘅係晉升慢。有啲醫生獲得內科專科資格後做咗八年都未升職,有啲更由受訓開始累積做咗十七八年都未升。兒科醫生更慘,等足二十年至可以升副顧問醫生。大佬,人生有幾多個二十年呀!

事到如今,已經唔可以靠高官講幾句話滅火嘞。如果醫生真係採取工業行動,唔講得笑㗎,咪以為秀才造反搞唔出乜花樣,呢,前年法國外科醫生唔妥政府醫療政策,三千人齊齊請假去英國梳乎一個禮拜,搞到政府踢晒腳。香港醫生智商唔會比法國行家低,如果決定抗爭,實會玩到政府氹氹轉。

唉,到頭嚟最吃虧嘅仲係病人。家陣公立醫院醫療事故已經多到冇朋友,如果再亂一亂,講唔埋又會整幾劑杰撻撻嘅,到時唔知又有幾多人淪為冤魂。周一嶽如果唔係有心謀財害命,就快快趣趣同醫生傾掂佢啦。叮佢個鎯鎯!

Money18新功能「18好路數」為你預測心水股票升跌機會率