政情:Rita冷待阿Paul單打

先係惡導遊阿珍,繼而係「刀手蓉」,搞到旅遊界滿城風雨,喺擾攘當中,又發生咗商務及經濟發展局局長Rita劉吳惠蘭涉嫌以「小心政治前途」「恐嚇」立法會旅遊界議員謝偉俊(Paul)事件。尋日「仇人」見面,冇人再提「恐嚇」事件,但佢哋心裏面仲有條刺就明顯不過。

有人批評旅遊業議會自己人管自己人玩晒,無力嚴打,政府於是拋出四個方案,包括升格議會、改革議會由非業界理事佔多數、成立獨立機構監管同由政府接手。早就話咗政府無意接呢個燙手山芋,Rita用地產代理監管局打比喻,話旅議會依家養六十幾人,每年要二千幾萬元;地監局多二十、三十人就用三千五百幾萬元,要諗吓資源、培訓同招募。

聽到Rita嘅比喻,立即發炮批評嘅除咗阿Paul之外,仲有佢嘅師傅詹培忠,兩人異口同聲問點可以因資源問題就唔去做,搞到Rita急補鑊,提高語調話冇講過負擔唔起或係咪值得,只係有人攞地監局出嚟講,咪提啲資料比較吓,講起嚟都幾勞氣。

阿Paul仲有意無意咁話,任何「小心」唔好得罪當權派嘅「提醒」佢都唔會理,而Rita就全程低頭睇文件,莫講話點頭,連眼神交流都冇,但佢對梁劉柔芬同劉健儀就好唔同,望住兩位女議員展現笑容,簡直判若兩人。