新紮「公職王」翟紹唐今日出任最低工資委員會（低資會）主席，尋晚特登去蒲勞工界新春酒會，為份新工「拜地主」。
勞工界新春酒會，係勞工界每年最人強馬壯嘅活動之一，翟紹唐接得低資會主席呢個燙手山芋，點可以唔把握機會同勞工界搞好啲關係？現場所見，翟紹唐滿場飛，同勞工界人士有講有笑，表現輕鬆。問佢今日返新工心情如何，佢笑住話最難係應對傳媒喎！講笑咩！喺最低工資問題上，勞工界先係難纏嘅對手，佢尋晚都應付得游刃有餘，使乜驚記者吖！
翟紹唐尋晚去勞工界新春酒會「拜地主」。
