政情：吳永嘉教路掃筍價茅台
香港茅台之友協會秘書長Jimmy吳永嘉，推動茅台美酒不遺餘力。尋日喺一個午宴撞到佢，幾杯落肚嘅佢爆咗個小秘密，話買上等茅台，除咗去貴州，識得去歐美唐人街中國辦館捐窿捐罅，一樣執到寶，仲有啲係超筍價添！
何解？原來唔少辦館老闆早年愛儲存茅台，可惜外國人唔多好飲，識貨者少，佢身邊有朋友無意中發現門路，兩年前派人去美國三藩市同洛杉磯等唐人辦館掃貨，更發現當中有珍藏二、三十年嘅極品茅台。辦館老闆見有知音人，悉數出售，價錢仲唔貴。
消息好快傳咗出去，唔少茅台友聞風而至，但凡多華人聚居嘅唐人街，貨源已近水尾。Jimmy畀貼士大家，想入貨嘅話，可以考慮去較少華人聚居嘅省市，話唔定執到寶喎！
吳永嘉