政情：棠哥握手有力跳跳紮
工聯會會長鄭耀棠做完頸椎移位手術唔夠兩個禮拜，未完全康復仲要休養。有工聯會「姑爺」之稱嘅立法會議員「象哥」黃定光近日探望過棠哥，話見到佢跳跳紮，不知幾輕鬆。象哥話，佢同棠哥喺內地某屋苑做鄰居，兩人經常有開枱切磋麻雀，但棠哥患病後，打麻雀連甩牌都冇力，做完手術就即刻唔同晒，同佢握手仲好有力添！
尋日勞工界舉行新春酒會，勞工界領袖雲集，見到立法會前議員劉千石，佢話同棠哥好熟，兩人仲分享過點樣對抗頸椎病。原來石哥兩年前頸椎都出現過問題，個人無故跌倒，睇中醫用針刀醫治後已經好番，當棠哥四出打聽有乜方法醫頸椎病時，佢都建議棠哥去試試。