政情：搞搞政：立會海濱小組豪遊美加

幾經波折後，立法會海濱規劃事宜小組委員會嘅北美豪華考察團終於可以成行，睇嚟委員會主席劉秀成可以鬆一口氣嘞！

坐商務艙團費八萬

呢個團途經多倫多、波士頓、紐約、達拉斯同溫哥華，由東岸玩到西岸，確實未出發先興奮。豪爆團預計四月二十四號出發，一直玩到五月二號先返港，早機去晚機返，酒店連食宿加雜費，坐經濟艙就每位四萬九千蚊，坐商務艙就齊頭八萬蚊，可想而知有幾豪。

所謂有權利就有義務，呢次立法會秘書處先小人後君子，講明要議員填清楚佢哋嘅要求，好似坐經濟艙定商務艙、近窗定近走廊、要唔要用飛行里數、食唔食素，同埋會否提早出發或者延遲返港等，事關訂好晒之後又話改要罰錢。仲有，秘書處亦提醒想去嘅議員應該去足全程，唔好半途離隊鬆人。

立法會議員四年任期裏面，如果用到最盡，每人有五萬五千蚊外訪開支，如果唔夠要自己補貼，有剩就拎出嚟攤分。