鬍鬚曾唔鬧唔醒 預算案唔改唔得

奇怪奇怪真奇怪，中東國家接二連三爆發革命，主要係因為貧窮而起。但喺香港，經濟復甦，庫房水浸，居然亦會爆發「預算案革命」，你都咪話唔出奇。

鬼咩，呢個特衰政府冇嘢叻，最叻就係添煩添亂，連派糖都派出個大頭佛，真係匪夷所思。呢，新預算案雖然使咗唔少錢，可惜應使嘅唔使，唔應使嘅就亂咁使，結果搞到怨聲四起，全城怒罵。最無厘頭就係大拿拿派咗二百四十億入強積金，打工仔有得睇冇得使，淨係益咗班基金經理，你話唔嬲就假啦！

水能載舟，亦能覆舟，港府施政不得民心，民怨排山倒海而來，一場政治風暴蓄勢待發。嗱，預算案公布之後，日日都有人上街抗議，連紀律部隊等公務員都話要加入聲討大軍。而立法會內更加精彩，泛民議員固然嘈到拆天，建制派議員亦態度強硬，要求政府修改，否則隨時否決預算案。哈，到時咯喎，一係解散立法會，一係特首落台，簡直好睇過大戲！

一場憲制危機迫在眉睫，搞到財政司司長曾俊華方寸大亂，進退失據，嗰邊仲死撐預算案冇修改空間，呢邊又話微調好艱難喎。所謂艱難，即係可以修改喇。其實，世上無難事，只怕有心人，預算案唔係唔改得，問題係當局肯唔肯順應民意嘅啫。

正如學者話齋，預算案唔係鐵板一塊，當中有好多細節可以調整。譬如九十年代初，當時嘅財政司翟克誠都曾經主動修改過預算案啦，港英政府可以，點解特區政府唔可以呢？

講起呢份預算案，真係得啖笑。鬍鬚曾之前扮晒嘢，一時粉墨登場上電視賣廣告，一時又周圍搞諮詢會，點知搞完一大輪，最後拋出呢份被形容為「史上最廢」嘅預算案，你話佢究竟係真諮詢，抑或真做騷吖喇？

查實，港府施政不得民心，自取其辱嘅例子已經多不勝數嘅喇。例如環境局企圖將部分清水灣郊野公園劃做堆填區，最後畀市民鬧到收手；又如交通津貼方案問題多多，勞工及福利局局長張建宗實牙實齒強調方案「無修改空間」，最後咪又係要自打嘴巴！

講到底，錯就要認，打就要企定，面對全城怒罵，預算案唔改唔得。鬍鬚曾，咪話太一叮唔提醒你吖，從善如流，回頭是岸，如果你冥頑不靈，擇惡固執，隨時爆發憲制危機不特止，仲可能重演五十萬人上街添吖，叮！