City Parade：靈射光芒
肉眼睇唔到嘅世界，神秘莫測。有緣人，可與之溝通感應。醉心攝影嘅已故全國政協副主席霍英東嘅大女霍麗萍（Pat），十多年來不斷拍得靈光異象。上周二喺中環ifc商場舉行「靈光一現」慈善攝影展，城中超級富豪紛撐場，齊來感應異度空間。另外，東華三院為籌募擴展服務經費，早前一個禮拜五喺尖沙咀洲際酒店搞「140周年Spring Awakening慈善晚會」，高官、善長及城中名人到賀，場面星光熠熠，短短一個晚上，便籌得逾四百萬元善款。
四叔睇到眼定定
霍麗萍（右）向恒基主席李兆基（左）講解拍得金光閃閃靈球嘅傳奇經過，四叔禁不住嘖嘖稱奇。
東華慈善晚宴
何超蕸心情靚 賭王千金兼東華總理何超蕸未受家族分產風波影響，與鐘錶大王孫秉樞開心出席party。
東華眾主席齊撐場
東華辦喜事，主席梁定宇、前主席李三元、第二副主席陳文綺慧、第四副主席施榮恆及東華檔案及歷史文化總主任史秀英齊撐場。
邱詠麒皮草顯貴氣
富豪邱德根孫女邱詠麒披上暖笠笠皮草，貴氣十足。
最in春夏裝優先場
國際著名時裝品牌VERSACE贊助時裝表演，展示2011年春夏男女服飾。
霍麗萍影展
郭炳湘夫婦拍拖到場 郭李天穎喺老公郭炳湘身邊，笑得甜如蜜糖，默契盡在不言中。
霍家兄弟志趣相投
霍震霆愛用手機捕捉生活，細佬霍震宇留學美國時已迷攝影，兩兄弟真合拍。
嘉頓新抱請孖女遊埠
嘉頓新抱張王幼倫一對孖女新年剛滿二十歲，佢請囡囡遊西班牙，還送鑽石耳環做紀念。
李家誠欣賞傑作
李兆基公子李家誠對霍麗萍嘅作品好欣賞。